دليل الشغل الإداري للمحامي المبتدئ (ج1): من ملف الدعوى حتى أسرار الرول والأجندة

سلسلة: الشغل الإداري (الجزء الأول)

الدليل الشامل لفهم ملف الدعوى القضائية

"اقرأ ملفك قبل أن تنطق بكلمة أمام القاضي!"

📚 المكتبة القانونية الشاملة 📝 صيغ الدعاوى والطلبات ⚖️ كشكول الاختبارات

💡 مقدمة في فهم ملف الدعوى

في البداية، ده شكل ملف الدعوى، وهتلاقي شكل الملف في الملف المرفق في المقال. لما تيجي تمسك ملف الدعوى اللي موجود في المكتب، هتلاقي عليه أسماء وأرقام وتواريخ وملاحظات وحاجات كتير إنت مش فاهمها.

في الملف ده هشرح كل كلمة بالتفصيل معاك، بحيث بعد ما تخلصه تقدر تمسك أي ملف دعوى وتفهمه وتتعامل معاه.

💡 ملحوظة: ملف الدعوى ممكن يختلف شكله من مكتب للتاني، لكن الشكل اللي معانا ده من أكتر الأشكال العملية والشائعة. والاختلافات دي مش جوهرية، لأن في النهاية كل ملفات الدعاوى بتحتوي على نفس البيانات الأساسية اللي لازم تكون موجودة في أي ملف دعوى.

والشرح في الملف ده هيبقى متقسم إلى ثلاثة أقسام أساسية علشان يبقى سهل وواضح في المتابعة.

1️⃣ الجزء الأول: بيانات المحكمة والقيد

🏢 1. المحكمة:

وهي المحكمة اللي مرفوع فيها الدعوى، مثال: محكمة جنوب المنصورة الابتدائية.

⭕ 2. الدائرة:

ودي المقصود بيها الدائرة اللي بتنظر الدعوى، مثال: الدائرة السادسة. ولازم تعرف إن المحكمة متقسمة دوائر، وكل دائرة ليها أيام جلسات مختلفة، فلازم تكون عارف دعواك في أي دائرة وأي يوم.

🔢 3. رقم القضية بالدرجة الأولى (الجزئي):

وده الرقم الأساسي اللي بتمشي بيه الدعوى من بدايتها، مثال: 1234 لسنة 2026 جزئي.

🔄 4. رقم القضية بالدرجة الثانية (الاستئناف):

وده بيظهر في حالة الاستئناف برقم جديد، والأرقام دي مهمة جدًا لأنها بتميز الدعوى عن غيرها.

📝 5. رقم التوكيل:

وده مكتوب في التوكيل الخاص بالدعوى، ولما تحضر قدام القاضي بتقول: الحاضر عن المدعي بموجب توكيل رقم كذا وتقول البيانات.

📂 6. رقم الملف بالمكتب:

بعض المكاتب بتعمل ترقيم داخلي لكل دعوى لتسهيل المتابعة، وده بيتكتب في خانة رقم الملف بالمكتب.

2️⃣ الجزء الثاني: أطراف الدعوى

👤 أولاً: الموكل

• اسم الموكل: وده بيكون اسم الشخص اللي وكلك في الدعوى.
• صفته: وهنا بتكتب صفته حسب نوع الدعوى، سواء مدعي أو مدعى عليه في القضايا المدنية، أو متهم أو مجني عليه في القضايا الجنائية.
  مثال جنائي: اسم الموكل: (أ) – صفته: متهم.
  مثال مدني: اسم الموكل: (أ) – صفته: مدعي.
• العنوان: ممكن تكتب عنوان الموكل إذا احتجت.
• التليفون: ممكن تكتب رقم التليفون إذا احتجت.

👥 ثانياً: الخصم

• اسم الخصم: وده بيكون اسم الطرف الآخر في الدعوى.
• صفته: وهنا بتكتب صفته حسب نوع الدعوى.
  مثال جنائي: اسم الخصم: النيابة العامة – صفته: سلطة الاتهام.
  مثال مدني: اسم الخصم: (ب) – صفته: مدعى عليه.
• العنوان: في القضايا المدنية ممكن يتكتب عنوان الخصم إذا احتجت (مش أساسي).
• التليفون: ممكن يتكتب رقم الخصم إذا احتجت (مش أساسي).

3️⃣ الجزء الثالث: الموضوع والجلسات

📝 الموضوع:

هنا بيتكتب موضوع الدعوى، مثال في الجنايات: اتجار في مواد مخدرة وسلاح ناري.

🔢 رقم الرول:

هو الرقم اللي بتحضر بيه في الجلسة. بمعنى إنك بتبقى معاك رقم الدعوى وبتدور عليها سواء قبل يوم الجلسة عند السكرتير أو في نفس يوم الجلسة، وبيكون في ورق متعلق على الحيطة جنب القاعة، بتدور فيه برقم الدعوى وتعرف رقم رولك.

📅 تاريخ الجلسة:

هو اليوم اللي هتنظر فيه الدعوى ولازم تعرفه مسبقًا وتكتبه على الملف. مثال: الجلسة يوم 2025/9/1. تراجع الرول عند السكرتير أو في ورق الجلسة يومها وتعرف إنك مثلًا رول 128، وده طبيعي حتى لو فيه 200 رول في جلسة الجنح. بتنتظر لحد ما يتنده على رقم رولك وتدخل أمام القاضي.

⚖️ الدفوع والطلبات:

هنا بتكتب اللي هتقدمه أو هتطلبه في الجلسة. مثال: لو الدعوى اتأجلت لإعادة الإعلان، تكتب في خانة التاريخ: تأجيل لجلسة كذا، وفي خانة الدفوع: تأجيل للإعلان بالدعوى المدنية… وهكذا.

📥 تحميل صيغة ملف الدعوى (PDF)

لشرح تفصيلي قم بتحميل نموذج ملف الشرح أعلاه لاستخدامه في مكتبك.

📥 تحميل ملف الشرح PDF

إعداد: إبراهيم الباز النجار

مؤسس منصة «دونها في كشكولك»

نسعى لتبسيط الإجراءات القانونية للمحامين والمواطنين لضمان نيل الحقوق المشروعة.

🎵 TikTok 📘 Facebook 🔗 LinkedIn 📢 Telegram