سلسلة: الشغل الإداري (الجزء الرابع)
الدليل القانوني لكتابة الشكاوى الجنائية بدقة
%20(1).jpg "كتابة الشكوى الجنائية - الشغل الإداري")
"الشكوى المكتوبة بدقة.. هي نصف الطريق لنيل الحق!"
💡 مقدمة: كيف تبدأ الشكوى؟
علشان نكتب شكوى، لازم الأول نعرف بشكل سريع إحنا وصلنا للنقطة دي إزاي؟ في البداية هفهمك الأول بقصة بسيطة.
قصة: في شخص اسمه كريم، تعدى على شخص اسمه سامي بالضرب، وسبب له إصابات، دلوقتي سامي عايز ياخد حقه، فراح لمحامي وحكاله اللي حصل، المحامي سمع سامي كويس جدًا، وكتب الشكوى بدقة ووضوح علشان يضمن له حقه، وبعد كده قدم الشكوى في قسم الشرطة علشان يبدأ أول خطوة قانونية في القضية.
1️⃣ لماذا نكتب شكوى بدلاً من المحضر المباشر؟
دلوقتي ممكن ييجي في بالك سؤال: ليه ما رحتش على طول قسم الشرطة وعملت محضر بدل ما أكتب شكوى؟ في الحقيقة، سواء رحت عملت محضر في القسم أو كتبت شكوى وقدمتها هناك، فالاتنين بيضمنوا لك حقك.
لكن من وجهة نظري، كتابة الشكوى بتكون أفضل لعدة أسباب:
- 1ـ الدقة في التفاصيل: الشكوى المكتوبة بتضمن إن كل البيانات والأحداث مظبوطة ومفيش فيها أخطاء.
- 2ـ تجنب النسيان: بتخليك تكتب كل حاجة وانت هادي من غير ما تسقط تفاصيل مهمة.
- 3ـ توفير وقت وجهد: الشكوى المكتوبة بتسهل على أمين الشرطة شغله، خصوصًا وسط الزحمة والكم الكبير من المحاضر اللي بيكتبها يوميًا.
- 4ـ الجانب القانوني: كمحامي تقدر تضيف المادة القانونية اللي بتقوي موقفك وتوضح نوع الواقعة.
2️⃣ خطوات كتابة الشكوى (شرح مفصل)
هنقسم كلامنا لأربع أجزاء رئيسية:
📄 الجزء الأول: رأس الشكوى
الجزء ده هو بداية الشكوى، وفيه بتوضح هتقدمها لمين، فلازم تكون البيانات مكتوبة بدقة ووضوح.
مثال عملي: السيد / مأمور قسم شرطة (اسم القسم) - تحية طيبة وبعد.
👤 الجزء الثاني: بيانات الأطراف
في الجزء ده بتكتب بيانات الطرفين بشكل واضح، اللي هما الشاكي (اللي بيقدم الشكوى) والمشكو في حقه.
مثال عملي: السيد / (اسم الشاكي بالكامل)، المقيم بـ (عنوانه بالكامل) - ضد السيد / (اسم المشكو في حقه بالكامل)، المقيم بـ (عنوانه بالكامل).
📝 الجزء الثالث: الموضوع (أهم جزء)
في الجزء ده بتكتب تفاصيل الواقعة بشكل واضح ومنظم، كأنك بتحكي اللي حصل، وبتجاوب على أربع أسئلة: إيه اللي حصل؟ إمتى؟ فين؟ وإزاي؟ علشان توضح كل ملابسات الجريمة بدقة، وبتمشي بنفس النهج ده:
الموضوع: أتقدم إليكم بهذه الشكوى ضد المذكور أعلاه، لما تعرضت له من (اذكر نوع الاعتداء) في يوم (اذكر اليوم) الموافق (اكتب التاريخ)، حوالي الساعة (اكتب الوقت)، وذلك في (اذكر مكان الواقعة بالتفصيل).
لقد قام المُشتكى عليه، (اسم المُشتكى ضده)، بـ (اشرح الأفعال التي قام بها بالتفصيل، مثل: الاعتداء علي بالضرب، أو سرقة هاتفي المحمول، إلخ).
الأساس القانوني: ويُتهم المشتكى عليه بارتكاب جريمة (اذكر نوع الجريمة مثل: الضرب، السرقة، إلخ)، وهو ما تنص عليه المادة (اذكر رقم المادة) من قانون (اذكر اسم القانون، مثل: قانون العقوبات).
نتيجة لهذا الاعتداء، تعرضت لـ (اذكر الإصابات أو الخسائر التي لحقت بك، مثل: إصابات بالغة، كسر في...، خسارة هاتف محمول، إلخ). وقد قمت بالتوجه إلى (اسم المستشفى إن وجد) لتلقي العلاج وأرفقت مع هذه الشكوى (اكتب التقرير الطبي أو أي دليل مادي آخر).
الشهود: لو في أي حد شاف اللي حصل، لازم تذكر اسمه عشان يساعد المحقق يثبت الواقعة.
⚖️ الجزء الرابع: الطلب والخاتمة
وده بيكون آخر جزء في الشكوى، واللي بتطلب فيه من الجهة المسؤولة إنها تتخذ الإجراءات القانونية ضد الشخص اللي تعدى عليك.
مثال عملي: التمس من سيادتكم اتخاذ اللازم قانونًا نحو هذه الواقعة الثابتة في حق المشكو في حقه. - مقدم لسيادتكم: .....
إعداد: إبراهيم الباز النجار
مؤسس منصة «دونها في كشكولك»
نسعى لتبسيط الإجراءات القانونية للمحامين والمواطنين لضمان نيل الحقوق المشروعة.