امتلك الآن "حقيبة دونها في كشكولك القانونية" الشاملة ⚖️
سلسلة المحامي المبتدئ، شرح الدعاوى، وجميع صيغ المنصة بصيغة Word.. محتواك القانوني في مكان واحد!
سلسلة الشغل الإداري: أدوار الجدول والرول والأجندة والمحضرين في المحكمة
سلسلة: الشغل الإداري (الجزء الثالث)
أركان العمل الإداري بالمحكمة: الجدول، الرول، الأجندة، قلم المحضرين وأمين السر
%20(1).jpg "أركان العمل الإداري بالمحكمة - الشغل الإداري")
"دليلك داخل أروقة المحكمة والنيابة.. اعرف موظفيك!"
💡 الجدول (مكتب الاستعلامات والتحقيق)
المكان ده مهم جدًا إنك تعرفه، لأن معظم شغلك في التدريب هيبقى متعلق بيه، وبيكون موجود في النيابة، وليه أهمية كبيرة.
أمثلة عملية لدور الجدول:
- لو أستاذك عطاك ملف عليه رقم قضية، هتقدر من خلال الجدول تستعلم عنها وتشوف وصلت لحد فين، هل اتحدد لها أول جلسة؟ هل اتعمل فيها معارضة ولا لأ؟
- ممكن كمان تعرف أسماء المجني عليهم، أو نوع القضية، هل هي ضرب، سرقة، أو أي نوع تاني.
- أستاذك ممكن يطلب منك استخراج صورة من المحضر، أو صورة من الحكم، أو استخراج شهادة من الجدول. كل المعلومات دي موجودة فيه بشكل مرتب.
حالات القضية في الجدول:
لو سألت الموظف عن القضية رقم (1234 لسنة 2025 جنح قسم ثان المنصورة) وصلت لحد فين؟ ممكن يرد عليك بكذا رد:
- في العرض: يعني المحضر لسه منظور أمام أحد وكلاء النيابة لمباشرة التحقيق.
- في الاستيفاء (التحريات): المحضر بيكون مع أفراد المباحث في النيابة لتنفيذ طلبات أو استعلامات أو إجراء تحريات لإتمام التحقيق.
بعد ما تعرف موعد الجلسة، تكتبه على الملف، وبعدها قبل موعد الجلسة، تروح للسكرتير علشان تعرف الرول في الأجندة.
2️⃣ الرول (ترتيب الجلسة)
الرول هو ترتيب جدول القضايا في الجلسة. بعد ما تعرف موعد الجلسة، لازم تعرف قضيتك رقم كام في ترتيب القضايا لليوم ده، لأن الجلسة ممكن يكون فيها عدد كبير من القضايا، زي 200 قضية مثلاً.
مثال: لو قضيتك رول 52، يبقى القاضي هيمشي بالترتيب لحد ما يوصل للقضية رقم 52، وساعتها تدخل قدام القاضي لو معاك كارنيهك، سواء علشان تترافع، أو تطلب التأجيل للإعلان، أو أي إجراء تاني.
الرول بيتم معرفته من عند السكرتير قبل موعد الجلسة بكام يوم، لأن السكرتير بيكون عنده حاجة اسمها الأجندة، واللي فيها كل تفاصيل الجلسة.
3️⃣ الأجندة (سجل الجلسات والقرارات)
الأجندة بيكتب فيها السكرتير كل التفاصيل الخاصة بالجلسة. بيبدأ أولًا بكتابة القضايا الموجودة في الجلسة، وهتلاقي القضايا مترتبة على هيئة رول.
أهمية الأجندة:
- تساعدك في معرفة ترتيب قضيتك (الرول) من خلال البحث برقم القضية أو اسم المتهم.
- معرفة القرارات الصادرة في الجلسة. بعد ما الجلسة تخلص، تروح للسكرتير وتشوف الأجندة، وتدور على رقم الرول، وهتلاقي جنب القضية القرار (تأجيل، تأييد، حكم حضوري، وهكذا).
💡 تنبيه: الأجندة مقسمة حسب الأيام. لازم تكون عارف قضيتك يوم إيه، وتدور في الأجندة الخاصة باليوم ده.
4️⃣ قلم المحضرين (إعلان الخصوم)
هتقابل قلم المحضرين كتير جدًا في البداية، وده طبيعي لأنك هتشتغل شغل إداري. أستاذك ممكن يديك إعلانات ويقولك روح سلم الإعلان ده لقلم المحضرين.
نصيحة للمحضرين:
بعد ما تسلم الإعلان، هتاخد رقم الإعلان، والرقم ده مهم جدًا. بتكتبه على ملف الدعوى في خانة الملاحظات، علشان لما تيجي تستلم الإعلان بعد كده من المحضرين تقدر توصله بالرقم ده.
المحضرين مسؤولين عن إعلان الخصوم. لو الخصم اتعلن وما حضرش الجلسة، القاضي قد يطلب إعادة الإعلان، وساعتها بتروح تسلمه للمحضرين. كما يقومون بمهام أخرى مثل الإنذارات والإجراءات التي تتم على يد محضر.
5️⃣ أمين السر (السكرتير)
أمين السر، أو السكرتير، هو الشخص اللي بيقعد جنب القاضي في الجلسة وبيكتب كل حاجة بتحصل في محضر الجلسة.
دوره:
- داخل الجلسة: بيسجل كل اللي بيحصل، سواء طلباتك، دفوعك، أو أي ملاحظات بيقولها القاضي.
- إدارياً: هو المسؤول عن الأجندة، ومن خلاله تعرف قرارات الدعوى أو رقم الرول الخاص بقضيتك.
📥 تحميل دليل موظفي المحكمة (PDF)
قم بتحميل ملف PDF يحتوي على شرح لأماكن وأدوار الموظفين داخل المحكمة والنيابة.
إعداد: إبراهيم الباز النجار
مؤسس منصة «دونها في كشكولك»
نسعى لتبسيط الإجراءات القانونية للمحامين والمواطنين لضمان نيل الحقوق المشروعة.