لقيت مكتب ونزلت تتدرب خلاص.. المفروض تعمل إيه؟
بقلم: إبراهيم الباز
بما إنك لقيت مكتب بالمواصفات اللي قولتلك عليها في المقال اللي فات، دلوقتي أقدر أكملك تعمل إيه في أول خطواتك العملية.
وخد بالك، إنت دلوقتي في فترة تدريب، والفترة دي لا تقل أهمية عن أي فترة، بل تعتبر من أهم الفترات اللي هتعدي عليك وإنت طالب حقوق أو خريج. وده بسبب الصعوبات اللي بتواجهك؛ إنك متشتت، أو مش عارف تبدأ إزاي، ومش عارف تستغلها صح إزاي وتزود قيمتك العلمية إزاي.
النقطة الأولى: تعلم الشغل الإداري (بفهم وليس مجرد أداء)
حاول تتعلم الشغل الإداري في الأول، وده مهم جدًا وإنت في البداية. بس خلي بالك، الشغل الإداري مهم، لكن أوعى تقعد تشتغل شغل إداري فقط طول فترة التدريب وإنت مش بتتعلم غيره.
لو استمريت في الشغل الإداري بس، هتلاقي نفسك زهقت، وهتلاقي نفسك اللي بتشوفه النهارده بتشوفه بكرة، وهتعتقد إن هي دي المحاماة. ولكن المحاماة مش شغل إداري بس… لا، المحاماة هي فن الكتابة وفن المرافعة.
وخلي بالك وإنت بتتعلم الشغل الإداري، حاول تكون فاهم إنت بتعمل إيه، مش مجرد بتودي أوراق وتختم أوراق وخلاص زي ما قولت قبل كده. أوعى تغلط الغلطة دي… لازم تكون عارف كل حاجة تخص الورقة اللي في إيدك، مش مجرد أوراق معاك في شنطتك وخلاص.
النقطة الثانية: فترة المكتب بالليل
معظم المكاتب بيبقى فيها شغل محكمة الصبح، ومكتب بالليل. وده بتعرف فيه الشغل اللي هتعمله بكرة، وبتسجل مواعيد الجلسات اللي عرفتها من المحكمة الصبح، وهكذا.
المهم: أوعى تكون بتنزل المكتب بالليل ومش بتستفيد منه، وعبارة عن إنك قاعد مش بتعمل أي حاجة، أو كل اللي بتعمله إنك بتعرف شغلك الإداري اللي هتعمله بكرة، ومش بتتعلم قانون بجد.
النقطة الثالثة: إزاي تزود القيمة العلمية لنفسك؟
دي أهم نقطة هتخليك متميز، وإليك كذا حاجة هتفيدك جدًا:
1️⃣ البحث في الكتب
سواء كتب الكلية أو الكتب اللي إنت شاريها. ولو لسه مش عندك القدرة تشتري كتب، ييجي دور الذكاء الاصطناعي. دلوقتي بقى من أهم الوسائل المساعدة، وتقدر من خلاله تعمل بحث شامل في دقائق.
*نصيحة: شوف فيديوهات الأستاذ مصباح القربة بعنوان "محاضرة الذكاء الاصطناعي في مجال المحاماة" عشان تعرف المواقع الأدق.
2️⃣ البحث في يوتيوب
اليوتيوب مليان أساتذة قانون بيقدموا معلومات قانونية مهمة جدًا. اسمع الفيديوهات وحاول تفهم، ولو فيه معلومة صعبة، ارجع للذكاء الاصطناعي يفسرها لك.
✍️ اكتب… اكتب… اكتب
لازم تعمل كشكول خاص بيك. أنا كنت بدوّن كل حاجة من أول ما دخلت الكلية، وإلى الآن بفتح الكشكول ده وبراجع منه. اصنع مرجعك الخاص؛ كل معلومة بتتكتب كأنها بتتحفر في ذهنك.
من أهم القنوات اللي برشحها: قناة نقابة المحامين المصرية، فيها أساتذة من أكبر الأساتذة في الوطن العربي كله.
كلمة أخيرة..
"ده كان رأيي وتجربتي الشخصية، وممكن طبعًا يكون في أساتذة عندهم وجهة نظر أفضل وأوسع مني. فلو عندك معلومة شايف إنها مهمة وهتفيد الزملاء، ياريت تكتبها في تعليق علشان الكل يستفيد."