امتلك الآن "حقيبة دونها في كشكولك القانونية" الشاملة ⚖️
سلسلة المحامي المبتدئ، شرح الدعاوى، وجميع صيغ المنصة بصيغة Word.. محتواك القانوني في مكان واحد!
كيف تبدأ تدريبك في المحاماة وتصنع عقليتك القانونية؟ (كشكول المحامي)
كيف تصبح محامياً ناجحاً؟ | الدليل الشامل للتدريب
بقلم: إبراهيم الباز
لو أنت طالب في كلية الحقوق وعاوز تنزل تتدرب في مكتب محاماة، أو حتى خريج ولسه نازل التدريب… يبقى لازم تاخد بالك من ٣ نقط دول وإنت نازل تتدرب.
في البداية، لو أنت طالب وعاوز تنزل تتدرب في مكتب محاماة، فده اختيار مميز جدًا لأنه هيغير من فكرك وهتحس بتغيير كبير في عقليتك القانونية. لكن لازم تاخد بالك من ثلاث نقاط أساسية علشان تنزل تتدرب صح.
النقطة الأولى: اختيار المكتب
لازم تتدرب في مكتب يعطيك القيمة العلمية اللي نازل علشانها. يعني إيه؟ يعني لازم المكتب يعلمك، ويكون فيه قضايا متنوعة.
نصيحة هامة: متقولش أنا بحب الجنائي يبقى أعيش في مكتب جنائي. غلط، لأن لازم تفهم في كل حاجة حتى لو نبذة بسيطة. ولما تتخرج أو أنت خريج من الأساس، القضايا اللي هتجيلك تشتغلها بنفسك هتبقى شغل بسيط زي إعلام الوراثة، صحة توقيع، حاجات بسيطة، مش قضية قتل ولا مخدرات. فـ علشان كده لازم يبقى مكتب متنوع.
في البداية هتتعلم أماكن المحاكم والشغل الإداري البسيط، وبعدها هتتعمق واحدة واحدة. لكن إوعى تعمل الغلطة اللي ناس كتير بتعملها: إنك تنزل تعمل شغل إداري من غير ما تبقى عارف ليه بتعمل كده، ولا عارف الورقة اللي رايح تختمها دي بتاعة إيه وليه بتتختم.
على سبيل المثال: ممكن تروح تستعلم عن قضية يقولك دي لسه في الاستيفاء أو في العرض وأنت مش فهم يعني إيه استيفاء ولا يعني إيه عرض. وزي مثلًا تروح تستلم إعلانات وأنت مش فاهم ليه أصلًا بتستلمهم، وإمتى يتم مثلًا طلب إعادة الإعلان وكده. فلازم أي شغل حتى لو إداري تبحث وتفهم بيتعمل ليه.
لو مشيت إنك شغال شغل إداري بتجيب أوراق وتوصل أوراق وخلاص، هتعدي السنين وأنت لسه بتودي وتجيب ورق من غير تعليم فعلي. وده غلط كبير… لأنك نازل تكتسب قيمة علمية، ولو ملقتهاش يبقى السبب الرئيسي للتدريب مش موجود. في الحالة دي لازم تدور على مكتب تاني.
(الكلام ده بينطبق على الطالب والخريج، لكن الاختلاف في مدة التدريب).
النقطة التانية: فترة التدريب دي بتبقى قد إيه؟
في البداية عاوز أعرفك إن الفترة دي بتختلف من شخص لشخص. بمعنى إن في أشخاص لما بيتخرجوا بيقدروا يتعلموا الشغل الإداري في خلال ثلاث شهور مثلًا أو أقل، ودي مدة كويسة جدًا من منظوري، وبعد كده بيتعمقوا في القضايا.
وفيه أساتذة محامين ممكن يقعدوا يتعلموا في مكتب سنة أو سنتين أو تلاتة، وفي ناس ممكن يقعدوا كتير جدًا، وده إذا كان المكتب بيعلمه كل يوم جديد وهو شايف إنه ممكن يستفيد أكتر من المكتب، فممكن يقعد فترة طويلة شوية. ولكن قولًا واحدًا: إنك تستقل وتفتح مكتب من البداية، أي بعد ما يبقى قيدك ابتدائي، فده من منظوري الشخصي هو الصح.
أما لو أنت طالب:
مدة التدريب بتبقى مفتوحة، وده اللي بيميز إنك لو نزلت تتدرب وإنت طالب، لأنك سواء اتعلمت في شهر أو سنة فأنت لسه طالب وما استخرجتش الكارنيه. ففي إيدك إنك تتعلم حاجات كتير وإنت طالب، بداية من الشغل الإداري مرورًا بتعليم صياغة صحف الدعاوى وكتابة المذكرات وتكوين عقلية قانونية صحيحة، وكل ده وإنت لسه طالب.
ولكن هل أنت بتتعلم كل ده فعلًا من المكتب اللي بتتدرب فيه ولا لأ؟
قولًا واحدًا: مش كل حاجة بتتعلمها في المكتب. لو طبعًا أنت في مكتب كويس مع أساتذة كويسين هتتعلم كتير، ولكن في جزء كبير دايمًا محدش هيعلمهولك، حتى لو في مكتب كبير وبيعلم، هتلاقي في حاجات كتير لازم تتعلمها بنفسك.
طب هتتعلمها إزاي؟ في مصادر كتير:
- الكتب القانونية لو متوفرة.
- مشاهدة الفيديوهات التعليمية (زي مثلًا قناة نقابة المحامين المصرية وقنوات الأساتذة سواء فيسبوك أو يوتيوب).
- حضور الندوات والمحاضرات القانونية.
- استخدام الأدوات التقنية اللي ممكن تسهل عليك في البحث في موضوع ما كإجراء مؤقت لحد ما تتوفر الكتب.
النقطة التالتة: هل في مقابل مادي في فترة التدريب؟
بالنسبة للطالب المتدرب: هل في مقابل مادي للطالب اللي نزل يتدرب في مكتب أحد الأساتذة المحامين؟
في البداية لازم نعرف إن مفيش مرتب في معظم المكاتب للأسف، ولكن في حاجة ممكن نسميها مكافأة تدريب، والمكافأة دي بتختلف من مكتب للتاني. في مكاتب بتعرض تدريب للطلاب في الإجازة، ودي في نهاية فترة الإجازة بتاخد المكافأة. وفي مكاتب بتتدرب فيها على طول سواء فترة الإجازة أو فترة الدراسة، وهنا المكافأة بتكون يومية، يعني في نهاية اليوم بتاخد مبلغ معين وخلاص.
⚠️ تنبيهات هامة جداً:
- 🔴 لو مفيش قيمة علمية ومفيش مقابل مادي: أنصحك تخرج من المكتب بكل احترام وابحث عن مكتب آخر.
- 🔴 لو مفيش قيمة علمية وفي مكافأة بسيطة: برضه تخرج من المكتب بكل احترام وابحث عن مكتب آخر.
- 🟢 لو في قيمة علمية وفي مقابل مادي بسيط: خليك مكمل، لأن مهما كان، أنت طالب واحتياجك للقيمة العلمية أكبر بكتير من المقابل المادي حاليًا.
الهدف من التدريب هو تكوين عقلية قانونية، إنك تقدر تبقى فاهم قانون وتتعلم قانون، مش مجرد فلوس من غير تعليم. لازم تراعي إنك طالب علم مش موظف.
أخيرًا..
"خلي عندك يقين بالله إنك في يوم من الأيام هتفتح مكتب وتستقبل موكلين بنفسك. وفترة التدريب صعبة من جميع الجوانب، ولكن لو ما استحملتش فترة التدريب مش هتعرف تفتح مكتب وتستقل بنفسك، فاستحمل."
دي كانت من وجهة نظري الشخصية، وممكن يكون ليك رأي آخر أفضل مني. ولو عندك نصيحة وعاوز تقدمها لزملائك ممكن تقدمها، وجزاك الله خيرًا.
حقوق النشر محفوظة | إبراهيم الباز - دونها في كشكولك | 2026