صيغة تكليف بالوفاء (إنذار رسمي): الخطوة الأولى لاستصدار أمر الأداء
%20(1).jpg "صيغة إنذار رسمي بتكليف بالوفاء - دونها في كشكولك.")
"لا يمكن قبول أمر الأداء شكلاً بدون هذا الإنذار.. تعلم كيف تصيغه باحترافية طبقاً للمادة 202 مرافعات."
📜 أولاً: شرح مقدمة الإنذار (الديباجة)
إنه في يوم...: دا أول حاجة بتكتبها والنقاط دي بتتساب فاضية للمحضر.
بيانات الطالب (الموكل): هنا بتكتب اسم الشخص اللي حضرتك وكيل عنه وعنوانه بالتفصيل.
بيانات المحامي: بتكتب اسم المحامي وعنوان المكتب (المحل المختار).
بيانات المنذر إليه: بتكتب اسم المدعى عليه وعنوانه اللي عاوز تعلنه عليه.
💡 ثانياً: شرح موضوع الإنذار (لماذا نكتب هذه التفاصيل؟)
بموجب (سند الدين): بكتب نوع سند الدين علشان أوضح للمحكمة إن الدين ثابت بورقة مكتوبة، وده شرط أساسي في أمر الأداء. ولازم أذكر التاريخ علشان أثبت إن العلاقة القانونية قائمة فعلًا.
تحديد المبلغ: بكتب المبلغ بالتحديد علشان أمر الأداء لازم يكون عن مبلغ معين ومحدد، مش مبلغ تقريبي. تحديد الرقم بدقة بيخلي الطلب سليم قانونًا.
تاريخ الاستحقاق: بكتبه علشان أوضح إن ميعاد الدفع عدى، وبقى الدين واجب السداد فورًا. لأن لو الأجل لسه ما حلش، ما ينفعش أطلب أمر أداء.
المطالبات الودية: بكتب الجملة دي علشان أبين حسن نيتي، إني حاولت أطالب المدين وديًا قبل اللجوء للقضاء، وده بيمهد للخطوة الرسمية.
المادة (202) مرافعات: بكتب النص ده علشان أوضح للمحكمة إني عارف الإجراء القانوني، وإن قبل ما أطلب أمر الأداء لازم أنذر المدين وأديله مهلة 5 أيام على الأقل. لو ما عملتش كده، الأمر يترفض شكلاً.
📌 الخلاصة: الفقرة دي هدفها تثبت 4 حاجات:
- إن الدين مكتوب وثابت بسند.
- إن المبلغ محدد بدقة.
- إن ميعاد الدفع عدى (حل الأجل).
- التزامك بإجراء الإنذار والمهلة القانونية.
🔍 ثالثاً: شرح التكليف القانوني والتحذير
انتقال المحضر: بكتب الجملة دي علشان أثبت إن الإنذار تم بشكل رسمي عن طريق محضر، علشان المدين ما يقدرش يقول إنه ما كانش عارف.
تحديد المهلة (5 أيام): بذكر مهلة خمسة أيام علشان ده شرط قانوني حسب المادة 202 مرافعات، ولازم أدي فرصة أخيرة يدفع قبل القضاء.
التحذير بالعواقب: بكتب التحذير ده علشان أثبت إني أخطرته بالعواقب (أمر الأداء + فوائد + مصاريف). وده بيوضح حسن نية الطالب.
حفظ الحقوق: الجملة دي مهمة جدًا علشان أحافظ على أي حق قانوني تاني ممكن يظهر بعد كده، وما أكونش تنازلت عن أي طلب إضافي مستقبلاً.
📌 الخلاصة: الفقرة دي هدفها تثبت:
- إن الإنذار تم رسميًا وبالطريق القانوني.
- إن المدين أخد مهلة الـ 5 أيام كاملة.
- إبلاغ المدين بالعواقب والفوائد والمصاريف.
- إن الطالب حافظ على كل حقوقه المستقبلية.
📚 للمزيد من النماذج القانونية الحصرية
تابعونا على موقعنا الرسمي "دونها في كشكولك" للحصول على أقوى الصيغ والشروحات:
إعداد: إبراهيم الباز النجار - مؤسس «دونها في كشكولك»
نهدف إلى تبسيط القانون للجميع، وتقديم الدعم العملي للمحامين المبتدئين لضمان نيل الحقوق المشروعة.