خمس مشاكل شائعة للمتدربين الجدد في مكاتب المحاماة وكيف تتجاوزها
.jpg "نصائح المحامي المتدرب - منصة دونها في كشكولك")
بقلم: إبراهيم الباز النجار
كتير من الطلبة والخريجين بينزلوا تدريب في مكاتب المحاماة، وبعد فترة بيلاقوا إنهم مش بيستفيدوا بالشكل الكافي.
ده غالبًا بيحصل بسبب شوية أخطاء شائعة بين المتدربين الجدد. في المقال ده هنتكلم عن خمس مشاكل رئيسية ونعرض حلول عملية لكل مشكلة علشان تقدر تستفيد من تدريبك وتكتسب خبرة حقيقية.
المشكلة الأولى: الروتين الإداري
أول حاجة أغلب المتدربين بيعملوها في المكتب هي الشغل الإداري، وده شيء طبيعي جدًا في البداية.
لكن المشكلة إن الشغل الإداري أحيانًا بيطول مع المتدرب لدرجة إن كل يوم بيبقى شبه اللي قبله.
المشكلة الأكبر إن المتدرب بيعمل الشغل ده من غير ما يفهم هو بيعمله ليه أصلًا.
على سبيل المثال:
ممكن متدرب يروح يستلم إعادة إعلان، لكنه:
- مش عارف يعني إيه إعادة إعلان.
- مش عارف ليه بيتم طلبها في أول جلسة في بعض القضايا.
- مش عارف إيه الحالات اللي بيتم فيها إعادة الإعلان.
- ومش عارف أصلًا هل ممكن القضية تستمر من غير إعادة إعلان ولا لا.
كل اللي بيحصل إنه بينفذ المطلوب منه وخلاص.
وبتمر الشهور، والمتدرب لسه زي ما هو، ما اكتسبش معلومة قانونية حقيقية…
رغم إن الهدف الأساسي من التدريب هو التعلم واكتساب الخبرة.
وفي النهاية ممكن يندم إنه ضيّع وقت كبير كان ممكن يستغله في تعلم شيء مفيد.
الحل
الحل ببساطة إنك في بدايتك كمحامٍ متدرب أو كطالب متدرب طبيعي جدًا تعمل شغل إداري، وده مفيش فيه أي مشكلة.
لكن المهم إن الشغل الإداري ده ما يكونش مجرد تنفيذ أوامر وبس.
لازم تكون فاهم كل حاجة بتعملها من الألف إلى الياء.
يعني أي حاجة بتعملها لازم تسأل نفسك:
- أنا بعمل ده ليه؟
- إيه الهدف منه؟
- إيه الأساس القانوني ليه؟
خلينا نرجع لنفس المثال: إعادة الإعلان.
لو أنت رايح تستلم إعادة إعلان، لازم قبلها أو بعدها تبحث وتفهم:
- يعني إيه إعادة إعلان؟
- ليه المحكمة ممكن تطلب إعادة إعلان في أول جلسة؟
- إيه الحالات اللي بيتم فيها إعادة الإعلان؟
- هل ممكن القضية تستمر من غير إعادة إعلان؟
بمجرد ما تسأل نفسك الأسئلة دي، وتبحث عنها، الشغل الإداري هنا اتحول لتعلم قانوني حقيقي.
مش بس كده، أنت كمان هتستفيد من حاجات تانية، زي:
- إنك عرفت مكان قلم المحضرين.
- فهمت إجراءات عملية في المحاكم.
- اتعرفت على زملاء ومحامين أثناء وجودك هناك.
يعني حتى مهمة بسيطة زي استلام إعادة إعلان ممكن تكون فيها فوائد كتير جدًا لو تعاملت معاها بطريقة صحيحة.
طيب أتعلم إزاي الحاجة اللي ببحث عنها؟
الأمر بسيط جدًا.
خلينا نكمل على مثال إعادة الإعلان.
ممكن تبحث عن الموضوع من خلال:
- قراءة نصوص المواد في قانون المرافعات اللي بتتكلم عن الإعلان وإعادة الإعلان.
- البحث على الإنترنت.
- قراءة مقالات قانونية.
- مشاهدة شرح لأساتذة ومحامين بيشرحوا الإجراءات العملية.
إحنا دلوقتي في عصر التكنولوجيا، والمعلومات بقت متاحة بشكل كبير جدًا.
يعني حتى لو الأستاذ اللي بتتدرب عنده مشغول، تقدر تبحث بنفسك وتفهم الموضوع بشكل كامل.
وكمان تقدر تستفيد من المصادر الجاهزة اللي بتوفر شرح عملي للموضوع. فعلى سبيل المثال، من خلال منصة "دونها في كشكولك" هتلاقي ملف كامل خاص بشرح إعادة الإعلان بشكل تفصيلي، بدايةً من التعريف، مرورًا بالحالات اللي بيتم فيها طلب إعادة الإعلان، وصولًا إلى كيفية كتابة إعادة الإعلان عمليًا.
وده بيوفر عليك مجهود كبير في البحث، وفي نفس الوقت تقدر تعتمد عليه كبداية، وبعدها توسّع بحثك وتراجع المصادر المختلفة علشان تثبّت المعلومة وتفهمها بشكل أعمق.
المشكلة الثانية: لسه معندكش فن الكتابة
المشكلة التانية اللي بتقابل كتير من المتدربين إنهم بعد فترة كبيرة من التدريب يكتشفوا إنهم لسه معندهمش فن الكتابة القانونية.
والمقصود هنا إنك مش بتعرف تكتب صحف الدعاوى أو المذكرات أو الشكاوى أو التظلمات، رغم إن ده من أهم المهام الأساسية لأي محامٍ.
ممكن تلاقي نفسك قعدت سنة كاملة في التدريب، سواء كنت طالب أو خريج جديد، لكن في النهاية:
- مش بتعرف تكتب مذكرة دفاع.
- مش بتعرف تصيغ صحيفة دعوى.
- أو لما تيجي تكتب صحيفة دعوى، كل اللي بتعمله إنك بتكتب البيانات فقط.
لكن الحقيقة إنك مش فاهم أصلًا صحيفة الدعوى دي بتتكون من إيه، ولا عناصرها الأساسية، ولا طريقة صياغتها القانونية.
وبكده تلاقي نفسك ضيعت وقت كبير في التدريب، وفي النهاية لسه ما اكتسبت واحدة من أهم مهارات المحامي الأساسية.
الحل
الحل ببساطة إنك تبدأ تتعلم فن الكتابة القانونية بنفسك، سواء كنت طالب في الكلية أو خريج جديد.
لأن العبرة مش بالسن، لكن بالقابلية للتعلم.
تقدر تتعلم الكتابة القانونية من خلال:
- مشاهدة فيديوهات تعليمية.
- البحث في المواقع القانونية.
- قراءة صيغ الدعاوى والمذكرات المختلفة.
- محاولة كتابة الصيغ بنفسك والتدرب عليها.
وزي ما قولنا قبل كده، إحنا دلوقتي في عصر التكنولوجيا، وتقدر تتعلم مهارات كتير جدًا وانت قاعد في بيتك.
وطبعًا لو الأستاذ اللي بتتدرب عنده بيشرح لك وبيعلمك، فده شيء ممتاز جدًا. لكن في نفس الوقت ما تعتمدش اعتماد كلي على الآخرين.
لازم يكون عندك مهارة البحث القانوني بنفسك، لأن المهارة دي مش هتكتسبها إلا بالتجربة والبحث المستمر.
وكمان تقدر تستفيد من المصادر التعليمية الجاهزة. فعلى سبيل المثال، من خلال منصة "دونها في كشكولك" هتلاقي مجموعة من الملفات التعليمية اللي بتشرح فن الكتابة القانونية بشكل عملي.
ومن ضمنها مثلًا:
- سلسلة كيفية كتابة صحيفة الدعوى.
- شرح كيفية كتابة مذكرة الدفاع.
- طريقة كتابة الشكوى لقسم الشرطة.
- كيفية كتابة التظلم لاستخراج المحضر من الحفظ.
وكل الموضوعات دي تم شرحها في ملفات بشكل تفصيلي من الألف إلى الياء.
وده ممكن يكون بداية قوية ليك في التعلم، لكن لازم تعرف إن بحثك الإضافي وتدريبك المستمر هو اللي هيميزك عن غيرك.
المشكلة الثالثة: لسه ما بدأتش تتمرن على فن المرافعة
دي مشكلة منتشرة جدًا بين المتدربين الجدد.
ممكن متدرب يقعد سنة أو سنتين في التدريب، لكن في النهاية يكتشف إنه ما تعلمش إزاي يترافع قدام المحكمة.
كل اللي بيعمله في الجلسات هو:
- يطلب تأجيل القضية.
- أو يسلم ورق.
- أو يقف دقيقة وخلاص.
لكن ما حاولش يتمرن على المرافعة فعلًا.
والسبب في الغالب إنه بيقول لنفسه: "لسه صغير… ولسه قدامي وقت طويل."
لكن الحقيقة إن المرافعة من أهم مهارات المحامي الأساسية.
لأن المحامي في النهاية بيدافع عن حق موكله أمام المحكمة. فإزاي هيقدر يجيب حق موكله وهو أصلًا مش متعود يتكلم أو يترافع؟
الحل
أول خطوة علشان تتعلم فن المرافعة هي إنك تسمع مرافعات لمحامين كتير.
تقدر تعمل ده من خلال:
- مشاهدة مرافعات كبار المحامين المنشورة على الإنترنت.
- أو حضور الجلسات في المحاكم والاستماع للمرافعات بشكل مباشر.
ومن أفضل الأماكن اللي ممكن تتعلم منها في البداية هي قاعة الجنايات.
حتى لو أنت محامٍ لسه في جدول عام، حاول تدخل قاعة الجنايات وتقعد تسمع مرافعات الأساتذة. راقب كويس جدًا:
- إزاي المحامي بيبدأ المرافعة.
- إزاي بيتعامل مع المواقف المفاجئة.
- طريقة عرض الدفوع.
- ترتيب الأفكار أثناء الكلام.
حتى التفاصيل الصغيرة مهمة جدًا، زي مثلًا:
- لغة الجسد: هل بيتحرك كتير ولا واقف بثبات؟
- نبرة الصوت: هل كلامه كله بصوت عالي؟ ولا بيختار لحظات معينة يرفع فيها صوته علشان يبرز نقطة مهمة؟
كل الحاجات دي هتتعلمها مجرد ما تقعد تسمع وتلاحظ. علشان كده حضور الجلسات، وخصوصًا في قاعات الجنايات، يعتبر كنز حقيقي لأي محامٍ في بداية طريقه، لأنه بيساعدك تكتسب الجرأة وتفهم طبيعة المرافعة عمليًا.
التدريب على المرافعة
لكن علشان تتعلم المرافعة فعلًا، لازم تمارسها بنفسك.
يعني لما تمسك قضية:
- اقرأ القضية كويس جدًا.
- استخرج الدفوع القانونية الموجودة فيها.
- اكتب مذكرة الدفاع الخاصة بالقضية.
وبعد كده ابدأ تتدرب على المرافعة. ممكن في البداية تتدرب لوحدك، وبعد كده تترافع قدام زملائك في المكتب، أو قدام الأستاذ اللي بتتدرب عنده. كل مرة هتعمل كده، ثقتك بنفسك هتزيد أكتر. واعرف إنك طالما حضّرت مرافعتك كويس وكتبتها بشكل منظم، فغالبًا مش هتنساها. والخوف اللي بيكون في البداية شيء طبيعي جدًا، لكن مع الممارسة والتكرار هتتعود على الموقف.
المشكلة الرابعة: الاعتماد الكلي على الكتب بصيغة PDF
كتير من الطلبة والمحامين الجدد بيعتمدوا اعتماد شبه كامل على الكتب بصيغة PDF.
وطبعًا ده شيء مفهوم، لأن أغلب الطلبة أو الخريجين في بداية الطريق مش بيكون عندهم الإمكانيات المادية اللي تخليهم يشتروا كتب قانونية كتير، خصوصًا إن أسعار الكتب أحيانًا بتكون غالية.
لكن رغم كده، لازم نعرف إن الكتب الورقية مهمة جدًا في التعلم.
لأن القراءة في الكتب الورقية:
- بتساعدك على التركيز أكتر.
- بتخليك بعيد عن التشتت اللي بيحصل لما تقرأ من الموبايل أو الكمبيوتر.
- وبتخليك تقرأ بشكل أهدى وأكثر تنظيمًا.
علشان كده حاول تبدأ تشتري كتب قانونية حتى لو على فترات متباعدة. مش لازم تشتري كل الكتب مرة واحدة، لكن ممكن كل فترة تشتري كتاب واحد بس في موضوع معين. سواء كنت طالب في كلية الحقوق أو خريج جديد، مع مرور الوقت هتلاقي نفسك بدأت تكوّن مكتبة قانونية خاصة بيك. والمكتبة دي هتكون مهمة جدًا بعد كده لما تبدأ تشتغل في القضايا، لأنك هتحتاج ترجع للكتب دي وتبحث فيها عن معلومات تساعدك في قضايا موكليك. ومهما وصلنا للتكنولوجيا وسهولة البحث على الإنترنت، الرجوع للكتب القانونية يفضل حاجة مهمة جدًا لأي محامي.
المشكلة الخامسة والأخيرة: مش عارف تتعلم كيف تتعلم
في طلبة وخريجين كتير أثناء فترة التدريب مش عارفين يتعلموا إزاي يتعلموا.
وجملة "تعلّم كيف تتعلّم" من أهم الجمل اللي لازم كل طالب أو خريج يفهمها كويس.
لأنك لو عرفت إزاي تتعلم بشكل صحيح، هتقدر:
- توفر وقتك.
- وتحقق أكبر قدر من الاستفادة.
- وتبقى أكثر إنتاجية بذكاء، لأنك عارف تتعلم صح.
الحل
تقدر تتعلم إزاي تتعلم من خلال شوية خطوات بسيطة، منها:
أولًا: تابع الشخصيات الناجحة والمهمة، سواء في المجال القانوني أو حتى خارج المجال القانوني. لأن الشخصيات دي بتساعدك تبني عقلية صحيحة تقدر من خلالها ننجح في مجال المحاماة.
ثانيًا: حاول تشوف فيديوهات قانونية بشكل يومي، لأن ده هيساعدك تتعلم معلومات جديدة باستمرار.
ثالثًا: استثمر وقتك في تعلم مهارات جديدة، خصوصًا المهارات التكنولوجية اللي ممكن تساعدك توصل للمعلومة بسرعة وتوفر وقتك.
كل ده هتتعلمه من خلال:
- البحث.
- القراءة.
- متابعة الأساتذة والمحامين أصحاب الخبرة.
- سماع النصائح المهمة منهم.
وحاول دايمًا إنك تكتب النصائح والمعلومات اللي بتتعلمها، وتعمل خطة لأي حاجة قبل ما تبدأ فيها.
الخاتمة
لو قدرت تتجنب المشاكل دي:
- تتعلم الشغل الإداري بفهم كامل.
- تكتسب فن الكتابة القانونية.
- تتمرن على فن المرافعة.
- تكوّن مكتبة قانونية متينة.
- تعرف إزاي تتعلم بطريقة صحيحة وذكية.
هتقدر تحوّل فترة التدريب من وقت ضايع لمصدر خبرة حقيقية تفيدك طول حياتك المهنية.