صيغة صحيفة طعن بالاستئناف: الدليل الشامل والشرح التفصيلي
.jpg "نموذج وصيغة صحيفة طعن بالاستئناف - منصة دونها في كشكولك")
"الاستئناف هو طريقك عشان تصلح حكم أول درجة.. ركز في كتابة صحيفتك."
📜 أولاً: شرح مقدمة الصحيفة (الديباجة)
إنه في يوم ...... الموافق ...... الساعة .......
دا أول حاجة بتكتبها في الصحيفة، والنقاط دي بتسيبها فاضية خالص عشان المحضر اللي هينزل يعلن هو اللي بيكتب التاريخ والساعة اللي راح فيها.
1. بيانات المستأنف (اللي هو موكلك)
بناءً على طلب السيد / .......... (هنا بتكتب اسم الشخص اللي حضرتك وكيل عنه ومقدم الاستئناف).
المقيم / .......... (بتكتب عنوانه بالتفصيل زي ما هو موجود في بطاقته).
ومحله المختار مكتب الأستاذ / .......... المحامي (بتكتب اسمك هنا)، الكائن بـ / .......... (بتكتب عنوان مكتبك عشان أي إعلانات تجيلك عليه).
2. بيانات المستأنف ضده (الخصم)
أنا ........ محضر محكمة ........ قد انتقلت وأعلنت :- (بتسيب النقط دي فاضية للمحضر).
السيد / .......... (بتكتب اسم الشخص اللي أنت كسبت ضده أو هو كسبك وعاوز تستأنف ضده).
المقيم / .......... (عنوانه اللي هيتعلن عليه بالظبط).
مخاطبًا مع / .......... (المحضر هو اللي بيكتب استلم لمين).
💡 ثانياً: شرح الموضوع (ليه بنعمل استئناف؟)
1. بيانات الدعوى الأصلية
"أقام المستأنف ضده ضد المستأنف الدعوى رقم (........) لسنة (........) أمام محكمة (........) طالباً في ختامها (تذكر الطلبات)."
هنا بنحكي الحكاية من الأول.. بنعرف محكمة الاستئناف إيه القضية اللي كانت شغالة في أول درجة، رقمها كام وسنتها كام والمحكمة اللي كانت منظورة قدامها، والمدعي كان طالب إيه في الآخر.
2. ذكر حكم محكمة أول درجة
"وبجلسة .../.../..... صدر حكم محكمة أول درجة والقاضي منطوقه بـ: (تكتب المنطوق)."
هنا بنكتب "القرار" اللي قاله القاضي في آخر الجلسة.. بتنقله من الحكم حرفياً (مثلاً: حكمت المحكمة بإلزام المدعى عليه بمبلغ كذا). الهدف إننا نحدد الحكم اللي مش عاجبنا وعاوزين نلغيه.
3. الطعن على الحكم والمواد القانونية
"ولما كان هذا الحكم لم يلقَ قبولاً لدى المستأنف، فإنه يطعن عليه بالاستئناف الماثل..."
الفقرة دي بتقول إننا مش موافقين على الحكم وعاوزين نعرضه على محكمة أعلى.
المادة (219): هي اللي بتدينا الحق إننا نستأنف الأحكام الصادرة من محكمة أول درجة.
المادة (230): هي اللي بتقول إن الاستئناف لازم يترفع بصحيفة تودع قلم الكتاب وتكتب فيها أسبابك.
4. شرح أسباب الاستئناف (يعني الحكم غلط في إيه؟)
1️⃣ الخطأ في تطبيق القانون وتأويله: يعني القاضي استخدم مادة قانونية ملهاش علاقة بالواقعة، أو فسر القانون بشكل غلط غير اللي المشرع يقصده.
2️⃣ القصور في التسبيب والفساد في الاستدلال: يعني القاضي مكتبش أسباب كافية تخلينا نفهم هو حكم كدة ليه، أو استنتج حاجة مفيش دليل عليها في القضية.
3️⃣ الإخلال بحق الدفاع: يعني حضرتك طلبت طلب مهم (زي سماع شهود أو خبير) والمحكمة رفضت أو تجاهلت الطلب ده، وده بيأثر على حقك في الدفاع.
4️⃣ مخالفة الثابت بالأوراق: يعني الورق والمستندات اللي في القضية بتقول حاجة، والحكم جه بيقول حاجة تانية خالص (زي مستند سداد موجود والحكم بيقول الشخص مسددش).
🔍 ثالثاً: شرح التكليف والطلبات النهائية
1. إجراء الإعلان
"أنا المحضر سالف الذكر قد انتقلت..." هنا بنثبت إن المحضر سلم الورق للخصم عشان يعرف إن فيه استئناف وميعاد الجلسة امتى.
2. تحديد المحكمة والجلسة
بنكتب اسم محكمة الاستئناف، ومكانها فين، والجلسة يوم إيه والساعة كام والدائرة رقم كام، عشان الخصم يحضر ويدافع عن نفسه.
3. الطلبات (أهم حاجة في الصحيفة)
أولاً (قبول الاستئناف شكلاً): يعني بنطلب من المحكمة تتأكد إن الاستئناف اتقدم في ميعاده الصح (زي الـ 40 يوم). لو اتقدم بعد الميعاد بيترفض شكلاً.
ثانياً (الموضوع): بنطلب إلغاء الحكم بتاع أول درجة، ونطلب الطلب بتاعنا (زي رفض الدعوى أو براءة الذمة).
المصروفات: بنطلب إن الخصم هو اللي يشيل مصاريف القضية وأتعاب المحاماة عن السنتين اللي قضيناهم في المحكمة.
إعداد: إبراهيم الباز النجار - مؤسس «دونها في كشكولك»
نهدف إلى تبسيط القانون للجميع، وتقديم الدعم العملي للمحامين المبتدئين لضمان نيل الحقوق المشروعة.